Барди позитивен на коронавирус, нема симптоми и контакт со останатите во репрезентацијата

Репрезентативецот Енис Барди доби позитивен тест на Ковид-19 и се наоѓа во изолација во тимската база на македонската фудбалска репрезентација. Тој е без симптоми и во добра здравствена состојба, објави попладнево ФФМ.

Фудбалерот на шпански Леванте при доаѓање на собирот на А репрезентацијата ги почитуваше мерките и здравствените протоколи за заштита од Ковид-19, како и сите останати фудбалери и членови на репрезентацијата и немаше контакт со тимските колеги и лицата од стручниот штаб.

– Енис Барди е без симптоми и се чувствува добро. Ние како лекарски тим постојано ја следиме неговата здравствена состојба. Пред извесно време имал контакт со дел од играчите на Леванте кои исто така имаат позитивен тест на Ковид-19. Важно е да се напомене дека пред почетокот на собирот на репрезентацијата беа почитувани и запазени сите протоколи согласно УЕФА здравствените регулативи се со цел да се избегне контакт со останатите фудбалери и членови на репрезентацијата. Останува да се следи состојбата и да веруваме дека ќе помине без промена на клиничката слика, изјави Александар Савески, дел од лекарскиот тим во А македонската репрезентација.

„Цврено-жолтите“ на 13 јуни ги очекува првиот натпревар во историјата на Европските првенства.

Претходно на 1 јуни и на 4 јуни, македонскиот национален тим ќе одигра пријателски натпревари со словенечката репрезентација и со Казахстан.

Back to top button
Close