Бектеши смирува: Ќе нема ценовни шокови, имаме доволно стокови резерви

Нема место за паника, нема да има притисок врз цените ниту, пак, ќе има ценовни шокови. Земјава има задоволителна количина прехранбени производи и нафтени деривати во стоковните резерви. Моментно нема потреба да се стават во функција, имајќи предвид и дека производителите на овие основни производи имаат резерви за период над 35 дена, не вклучувајќи ги деновите со кои може да се покриваме преку државните резерви, рече денеска министерот за економија Крешник Бектеши.

Тој апелира сите трговци да ја почитуваат владината одлука за трговските маржи зашто од неа, како што истакна, нема никој да загуби и најмногу ќе добијат потрошувачите.

Според Бектеши, анализите покажуваат дека руско-украинскиот конфликт директно не би влијаел врз македонската економија, имајќи ја предвид трговската размена.

„Кризата индиректно може да влијае, посебно во делот на енергенсите, зашто директно сме поврзани со над 70 отсто од трговската размена со ЕУ, но ги преземаме сите соодветни мерки на дневна основа за да нема ценовни шокови, посебно за клучните производи кои се најважни за потрошувачите и нашите граѓани – истакна министерот.