Бездомник позитивен на Ковид 19 синоќа побегнал од Градската болница „8 септември“
Бездомник позитивен на Ковид 19 синоќа побегнал преку пожарникарните скали во Градската болница „8 септември“ , информираше Фокус повикувајќи се на информации од Државниот санитарен и здравствен инспекторат, до каде што упативме неколку прашања.
„По допрен глас од социјалните мрежи, утринава ДСЗИ иницираше вонреден инспекциски надзор во ГОБ „8 септември“. Б.И. бездомник бил примен во болницата на 1 октомври. Согласно здравствената состојба бил стабилен, не бил за хоспитализација, но згрижен бидејќи нема постојано живеалиште, да не шири инфекција. Тој е тестиран на 3 октомври и добиен е негативен резултат – истакна за „Фокус“, доктор Ирина Бухова, директорка на ДСЗИ.
Сепак, два дена подоцна, поточно на 5 октомври, тој бил повторно тестиран и бил добиен позитивен резултат, односно дека е носител на корона вирусот.
