Битолчани принудиле Албанец од Шведска да ја соблече маицата со орел среде Широк Сокак: Жестока реакција на ДУИ
„Во четвртокот во 19:50 часот, во СВР Битола бил пријавен инцидент од С.Х.Д. (32) од Шведска, кој моментално престојува во Дебар. Тој информирал дека на улицата Широк сокак во Битола му пристапиле неколку непознати лица на возраст од околу 20 години и се обиделе да му ја соблечат маицата што ја носел. На маицата имало исцртани симболи на друга држава – орел, соопшти Министерството за внатрешни работи (МВР).
Откако сфатил дека не може да се одбрани од групата, ја соблекол маицата и им ја предал, по што тие заминале во непознат правец.
„Се вршат проверки за настанот и се преземаат мерки за пронаоѓање на сторителите,“ е наведено во полицискиот билтен.
По овој настан, пристигна реакција од Демократската унија за интеграција:
„Срамниот и опасен акт во Битола, каде што беше нападнат Албанец со шведско државјанство само затоа што носел маица со орел, претставува јасен доказ дека национализмот, дискриминацијата и омразата која секојдневно се потхрануваат од партиите на власт и од самиот државен врв.
Кога на трибините, во присуство на највисоките претставници на државата, одекнуваат повици на омраза, а никој не носи кривична одговорност, кога власта се потсмева изјавувајќи дека „не слушнала“ такви повици, тогаш не станува збор за изолирани инциденти, туку за намерна клима на поттикнување и релативизирање на омразата.
ДУИ предупредува дека ваквиот пристап е во директна спротивност со духот на Охридскиот договор и со вредностите врз кои се гради соживотот. Етничките напади, институционалната дискриминација и кампањите на омраза не настануваат спонтано – тие произлегуваат од политика која го става фотелјата пред еднаквоста и секој чин на етничко насилство го релативизира наместо да го спречи.
Апелираме до органите на правдата да реагираат со итни и бескомпромисни мерки. Секое одложување, секое молчење и секое оправдување ќе се смета за соучесништво. ДУИ ќе го брани секој граѓанин, секој симбол и секое уставно право, бидејќи државата не може да се гради врз омраза, туку врз еднаквост и заемна почит“, се вели во реакцијата на ДУИ.
