Богаташ од Лос Анџелес барал приватни пожарникари за да си го заштити домот, јавноста остро го искритикува
Додека пожарот во Пацифик Палисадес се засили во вторникот вечерта, извршниот директор на недвижности во Лос Анџелес, Кит Васерман, објави апел на социјалните мрежи: „Дали има некој пристап до приватни пожарникари за да го заштити нашиот дом во Пацифик Палисадес? Треба да дејствуваме брзо. Сите соседи ги губат нивните домови. Ќе платам се што е потребно“.
Постот, прегледан повеќе од 900.000 пати пред да биде избришан, беше широко критикуван како несензитивен, со многу обвинувања дека Васерман го става своето богатство над колективната криза.
„Која дрскост!“, напиша еден корисник, Сем Ванс. „Неговото семејство е евакуирано, а тој се обидува да вработи приватни пожарникари кои ќе си го ризикуваат животот за да спасат куќа која сигурно е осигурена. Неверојатно бесчувствително“. Друг критичар му го нападна чувството на самобитност, прашувајќи: „Значи, предлагате потенцијално животоспасувачки ресурси да се пренасочат кон вашата куќа само затоа што сте богат, додека десетици илјади луѓе се обидуваат да се евакуираат?“
Без разлика на критиките, Васерман првично одговори потценувачки, нарекувајќи ги своите критичари „тролови!“ и шегувајќи се, „Мамо, станувам популарен!“ Потоа целосно го избриша својот X профил.
Пожарите поттикнати од силните ветрови, уништија илјадници домови во Лос Анџелес, а некои жители прибегнаа кон екстремни мерки и големи трошоци. Жители платија илјадници долари за да ги испрскаат своите имоти со гелови против оган, додека други инвестираа во приватни противпожарни хидранти во близина на нивните домови.
И покрај жестоките реакции на објавата на Васерман, повеќето приватни пожарникари не се ангажирани од поединци, туку од осигурителни компании кои сакаат да избегнат големи исплати за осигурување, објасни за Си-Ен-Ен пожарникарот Мајк Статс од Сомерсет, Калифорнија.
Според информациите од веб-страницата на осигурителната компанија Чаб, нивните „Услуги за одбрана од шумски пожари“ им нудат на клиентите заштита од шумски пожари, што вклучува пристигнување на професионални пожарникари, отстранување на запаливи материјали околу домот и обложување на домот со гел кој апсорбира топлина.
Тим Бауер, потпретседател на фирма за наплата на штети рече дека по првите три дена од пожарот во Пацифик Палисадес, имал листа на чекање од најмалку 200 луѓе кои очајно ги бараат нивните услуги.
Во мирнодопски услови, цената на заштитната обвивка е околу 1.000 долари, но за време на критични ситуации се зголемува на 5.000 долари.
Експертите претпоставуваат дека трагедијата во Лос Анџелес веројатно ќе биде најскапата катастрофа во историјата на САД, со осигурани загуби кои би достигнале сума над 20 билиони долари.
