Боркица Груевска ќе сведочи за ,, Плацови на Водно”:Денеска сведочеа Урко и Ивона Талевска

Со сослушување на сведоци предложени од одбраната денеска во Основниот кривичен суд во Скопје продолжи судењето за случајот „Плацови на Водно”.

Прва беше сослушана актерката Софија Куновска, која рече дека во 2012 година била член на Советот на Град Скопје од советничката група на СДСМ, каде иако гласале против предложениот ГУП на Градот Скопје тие биле надгласани и тој бил донесен.

Сведокот Дејан Митревски – Урко, кој од 2000 до 2014 година работел како шеф на обезбедувањето на премиерот Никола Груевски, на прашање од адвокатот по службена должност на Груевски, дали некогаш чул Груевски да барал од некого урбанизирање на локацијата „Шербетница“ на Водно, тој рече дека такво нешто немал слушнато, ниту пак чул дека некогаш сакал да купи место на таа локација.

Прашан дали присуствувал на средба меѓу Никола Груевски и Јордан Камчев, сведокот рече класична средба немало, туку само случајно ако се сретнеле на улица или на настан.

На прашање од Судот, дали се грижел за обезбедување на неговиот дом и која е адресата, сведокот рече дека тоа било на улица Бихаќка, трети кат, стан 15.

– Не можам точно да се сетам кога последен пат сум се сретнал со него, ама мислам 2015 или 2016 година. Откако му заврши мандатот не му бев обезбедување – изјави Митревски.

Според Митревски, Груевски имал нормален однос и со Мијалков, со кого рече дека не се гледал често, додека бил премиер.