Бразилската полиција пронајде документ за мешање во изборните резултати во домот на поранешен министер на Болсонаро

Бразилската полиција во домот на поранешниот министер за правда пронашла нацрт-документ што се чини дека бил предлог за мешање во октомвриските претседателски избори, кои Жаир Болсонаро ги загуби, изјавија два извори блиски до истрагата.

Содржината на документот, изготвена откако Болсонаро ги загуби изборите со мала разлика од левичарскиот кандидат Луис Инасио Лула да Силва, предвидува воведување вонредна состојба, рекоа изворите.

Документот бил откриен во вторникот кога полицијата го пребарала домот на Андерсон Торес, кој стана шеф на обезбедувањето во бразилскиот главен град откако Лула ја презеде функцијата на 1 јануари.

Судија на Врховниот суд нареди апсење на Торес во врска со безбедносни пропусти што им овозможија на приврзаниците на Болсонаро да упаднат во владините згради во неделата во обид да извршат воен удар за да го соборат Лула.

Откривањето на документот првпат го објави весникот Фолиа ди Сао Паоло.

Торес, кој замина од Бразил за Флорида откако беше назначен за шеф на безбедност, на социјалните мрежи рече дека предметниот документ најверојатно е меѓу другите отфрлени документи чија содржина „протекла“ во негово отсуство за да се создаде „лажна приказна“.

„Ја почитувам бразилската демократија. Мојата совест е чиста во однос на моите постапки како министер“, напиша Торес.

Аналитичарите сметаат дека мерките предложени во документот претставуваат неуставен заговор за мешање во изборите.