Брнз за ТВ21: Северна Македонија е НАТО-сојузник и на линија со САД и другите во осудата на руската агресија во Украина

Северна Македонија работи со САД во НАТО и билатерално, за одбрана на интересите, вели американската амбасадорка

Северна Македонија е НАТО-сојузник и одговорна членка на меѓународната заедница, и им се придружи на САД и на другите во осудата на бруталната руска агресија и активната војна во Украина, изјави амбасадорката на САД во Северна Македонија, Кејт Мари Брнз.

„Кога сме на темата Украина, Северна Македонија е НАТО-сојузник и е силен партнер што држи чекор со ЕУ, одговорна членка на меѓународната заедница и ни се придружи на САД и на другите во осудата на дејствијата што се одвиваат во Украина во моментов, бруталната руска агресија и активната војна во Украина. Осудата беше јасно и недвосмислено потенцирана, но исто така обезбедува и поддршка за украинскиот народ, како сите нас, со обезбедување на поддршка што им е неопходна во моментов. Но мора да се осигуриме дека во даден момент некој ќе сноси одговорност за постапките на Русија“,вели амбасадорката Брнз во интервју за ТВ21 коментирајќи ја актуелната состојба со Украина.

Од друга страна, додава Брнз, Северна Македонија работи со САД во НАТО и билатерално, за одбрана на интересите.

„Работиме во НАТО за да се осигуриме дека обврската по членот 5 е цврста и дека сме подготвени да се браниме од секакви понатамошни дејствија и дека сме подготвени како меѓународна заедница, да се соочиме со долгорочните последици од тоа што се случува. Повторно, ова е незаконско и неоправдано дејствие со умисла од страна на Русија против Украина“,  вели амбасадорката Кејт Мари Брнз.