Делегација на Владата положи цвеќе пред споменикот на жртвите од земјотресот

 Делегација на Владата на Република Северна Македонија, предводена од вицепремиерката за економски прашања, Мила Царовска, министерот за внатрешни работи, Агим Нухиу и министерката задолжена за странски инвестиции Зорица Апостолска, денеска положи цвеќе на Споменикот на жртвите од земјотресот кој го погоди Скопје во 1963 година.

Скопје беше погодено од земјотрес со јачина од 6,1 степен по Рихтерова сеизмичка скала, 9 степени по Меркалиевата скала, во 5:17 часот на 26 јули 1963 година. Овој земјотрес, кој траеше 20 секунди, однесе 1070 човечки животи, дополнително беа повредени најмалку 3 илјади лица, а околу 200 илјади Скопјани останаа без покрив на главата.

-Главниот град на државата по земјотресот, стана симбол на солидарноста во светот. Во процесот на обнова на Скопје, точно 87 нации од светот испратиле помош со која придонеле тој да се изгради повторно, а поради тоа градот го носи и епитетот „град на солидарноста“, се посочува во соопштението на Владата.

Почит кон загинатите лица во земјотресот, како што се наведува во владиното соопштение, одадоа и градоначалникот на град Скопје Петре Шилегов, делегации од Собранието и Канцеларијата на Претседателот на државата, претставници на Армијата како и амбасадори и делегации од дипломатско-конзуларните претставништва во нашата земја и семејствата на жртвите.