Деспотовски ќе се кандидира за претседател на СДСМ: Пазарењето е погрешен пристап, треба натпревар на концепти и идеи

Јован Деспотовски објави дека ќе се кандидира за претседател на СДСМ, а кандидатурата ќе ја поднесе во зависност од роковникот. Вели дека овие избори не треба да се сведат на пазарење, туку на натпревар на концепти и идеи, луѓето да се изјаснуваат без притисок и без пазарење.

Тој е уверен дека на партијата, покрај длабоките реформи, и е потребен и лидер кој ќе обединува.

„Обединувањето на партијата треба да почне да се случува веќе сега, меѓутоа не на начин на којшто треба сите потенцијални структури или структури внатре да седнат и да се договараат, затоа што тоа е погрешен пристап. Пазарењето е погрешен пристап. Треба да се обединиме околу целта да имаме еден процес во којшто сите членови на партијата ќе им дадеме право, без фаворизирање и без странични игри, самостојно да се изјаснат за програмите кои треба сите кандидати да ги понудат“, рече Јован Деспотовски.

За оваа функција, според информациите, се очекува да се кандидираат и Стефан Богоев, Славјанка Петровска, но и Венко Филипче.