Дритон Небиу од Алијанса, нов директор на Агенцијата за управување со одземен имот
Дритон Небиу од Алијанса за Албанците е новиот директор на Агенцијата за управување со одземен имот. Ова на Фејсбук го објави досегашниот директор Фатон Асани од СДСМ.
„Секоја приказна има почеток и крај така да мојата приказна започна на 6 Август 2017 а крајот и дојде денес 10 Март 2023. Едно убаво животно искуство како директор во Агенција за управување со одземен имот , со еден прекрасен тим за работа со кој се направија енормни резултати, а за една институција дали напреднала или не може да зборуваат само БРОЈКИ“, напиша Асани.
Тој објави дека вчера извршил примопредавање на функцијата со новиот директор Дритон Небиу и вели дека се надева дека ќе продолжи со ист интензитет на работа и ќе реди успеси бидејќи остава прекрасен ТИМ на вработени. Тој се заблагодари за пожртвуваноста на тимот и за нивната доверба во него и неговите идеи. Асани додаде дека по еден изминат мандат, Државната агенција за конфискација ги остварила очекуваните бројки и норми.
„За успесите и резултатите на Агенцијата како што и претходно кажав, мерило се само бројките, а ние како тим ги имавме многу повеќе и од било која поставена НОРМА и не би редел затоа што се многу и ризикувам да го изгубам мојот лет за Болоња. Благодарност и до мојата СДСМ која ми ја даде безрезервната доверба и поддршка, сите овие изминати години , а секако голема благодарност до сите граѓани на РСМ кои воедно беа мојот мотив за достигнување на постигнатите цели и успеси“, смета Асани.’
Новиот директор пак, на Фејсбук објави дека честа да се предводи една институција како Агенција за управување со одземен имот, колку што е одговорна е и благородна од самиот факт дека истата претставува алка во системот преку кој на народот како реален сопственик му се враќа тоа што и му припаѓа, а некој сакал со истото да се збагати на нивна штета.
„Како управител на оваа Агенција ќе се заложам на секого да му припадне она што го заслужува и она за што работел. Затоа, управувањето со одземениот имот представува исправање на неправдата која му е нанесена на секој еден граѓанин на Република Северна Македонија со самото враќање на одземеното, украденото или незаконски стекнатото како и незаконски користеното во полза на граѓаните и за граѓаните. Работата на Агенцијата за управување со одземен имот во голема мерка зависи од она што правосудните органи ќе го докажат како незаконски стекнато или користено, напиша Небиу.
