Два стана на Груевски на Бихачка продадени за дупла цена за луксузните апартмани на Водно немало интерес
Во текот на вчерашниот ден се продаде дел од имотот на екс премиерот Никола Груевски, кој му беше одземен со случајот ,,Плацеви на Водно”.
За продажба беа објавени пет стана, три луксузни во комплексот Панорама на Водно и два на улицата Бихаќк. Како што информираат за ,,Фокус” од Агенцијата за управување со одземен имот, продадени се двата стана на Бихаќка, лоцирани веднаш до станот во кој живееше Груевски, а аукцијата за луксузните апартмани на Водно била неуспешна.
-Електронската лицитација за Апартманите на Ул.Тодор Александров беше неуспешна, односно немаше пријавени кандидати за учество.
Електронската лицитација за становите на ул.Бихаќка беше успешна и
истите се продадени во износ од 5.536.000,00 денари за реден број 5 и
8.068.000,00 денари за Реден број 6, одговорија од Агенцијата за ,,Фокус”.
Ова значи дека за становите имало голема заинтересираност бидејќи се продале за речиси двојни цена од проценетата. Поточно, поголемиот, оној од 57 метри квадратни кој се продаваше по почетна цена од 63.000 евра, достигна цена од 131.186 евра, а помалиот од 38 квадрати, се продаваше по цена од 44.000 евра, а надавањето заврши на сума од 90.016 евра.
Новите сопственици на двата стана се уште не можат да бидат откриени, бидејќи од Агенцијата чекаат да ги уплатат парите на сметка.
Груевски, пред да избега, живееше во дуплекс, односно два споени стана со површина од над 140 квадратни метри. Но, имал уште два стана на истиот кат, со вкупна површина од 100 квадратни метри. Едниот го користел како библиотека, а другиот како работна соба.
Како што веќе објави неделникот ,,Фокус”, неодамна Агенцијата за управување со одземен имот објави дека се продаваат неговите пет стана, од кои три се наоѓаат во луксузниот комплекс „Панорама“ на Водно, а два на Бихаќка, каде што претходно живееше бегалецот.
Трите стана на Водно, со вкупна површина од 750 квадратни метри, се со вкупна проценета вредност од над 2,4 милиони евра.
Апартманите се луксузно опремени, а од огромните балкони, со површина на просечен стан, Груевски требало да има неверојатна глетка кон цело Скопје.
Еден од апартманите е со големина од 155 квадратни метри, со балкон од 95 квадрати. Овој стан се продава по цена од 760.000 евра.
Вториот е со големина од 199 квадрати, со балкон од 48 метри квадратни и е проценет на 847.000 евра.
Третиот е речиси со идентична големина, односно од 200 квадратни метри и идентичен балкон од 48 квадрати. Проценет е на 851.000 евра.
,,Фокус” веќе објави дека се продаде и атрактивното земјиште на Сашо Мијалков во Гевгелија за помалку од еден милион евра.
