Ќе добие ли Шилегов друг ривал од ВМРО-ДПМНЕ во новата трка за Скопје?

Мицкоски, на денешниот брифинг, рече дека се „тестираат“ близу 40 потенцијални кандидати за градоначалник на Скопје, а конечниот избор ќе биде соопштен кон крајот на летото или во септември. Мицкоски не спомна имиња на личностите кои се во игра, додека соговорници од ВМРО-ДПМНЕ, во изјава за „360 степени“ не исклучуваат можност кандидат повторно да биде поранешниот скопски градоначалник Коце Трајановски, кој беше на функцијата во периодот од 2009 до 2017, во два мандати, а претходно беше и градоначалник на Гази Баба. На последните локални избори, во 2017 година, Трајановски, уште во првиот изборен круг, беше поразен од Шилегов, кој, пак, беше заеднички кандидат на СДСМ и на ДУИ.

Откако Шилегов повтори неодамна дека планира уште една кандидатура за Скопје, по што и партискиот лидер Зоран Заев потврди дека актуелниот градоначалник е негов фаворит за уште еден мандат, не се очекуваат поголеми изненадувања при изборот на кандидатот на СДСМ за главниот град. И во СДСМ велат дека се во тек анкети пред официјализирање на кандидатурите за градоначалници на изборите во октомври. Во однос на Скопје, од партијата велат дека Шилегов засега стои најдобро на анкетите во однос на другите можни кандидати, чие рангирање, пак, би можело да има влијание при составувањето на новата советничка листа за главниот град. Тоа што Шилегов е еден од двајцата актуелни градоначалници што влегоа во новиот состав на Извршниот одбор на СДСМ (покрај Стефан Богоев од Карпош), кој беше избран по конгресот на 16 мај и еден од ретките од претходниот состав на ова тело кој ја задржа позицијата, се посочува како аргумент плус за неговата можна нова кандидатурa

Тоа што Шилегов е еден од двајцата актуелни градоначалници што влегоа во новиот состав на Извршниот одбор на СДСМ (покрај Стефан Богоев од Карпош), кој беше избран по конгресот на 16 мај и еден од ретките од претходниот состав на ова тело кој ја задржа позицијата, се посочува како аргумент плус за неговата можна нова кандидатура.

Трајановски, исто така, влезе во новиот состав на Извршниот комитет на ВМРО-ДПМНЕ, што Мицкоски го назначи есента минатата година, во екот на превирањата во партијата и барањата за негова оставка по парламентарните избори. Исто така, во изминатиот период, тој мошне често ги критикуваше политиките на Шилегов.

Првиот круг од локалните избори треба да се одржи во втората, наместо во првата, половина на октомври, како што се договорија Заев и Мицкоски на последната тет-а-тет средба, кога договорија и одложување на пописот за септември.