Елмази: Абази да отвори предмет за јавните набавки на заштитни огради на патиштата

Поминаа три дена откако во јавноста излегоа сериозни информации поврзани со работењето на поранешниот директор на Јавното претпријатие за државни патишта, Ејуп Рустеми. Во напис објавен во печатен медиум беа изнесени скандалозни информации дека Рустеми вршел притисок врз една од најголемите европски компании за производство на заштитни огради да не учествува на тендери во Република Северна Македонија, изјави на прес-конференција Мухамед Елмази од Вреди, што МИА ја пренесува интегрално.

Една европска компанија била тргната настрана, а патот бил отворен за компанија од Србија.

Тука не зборуваме за обичен тендер. Тука зборуваме за елиминирање конкуренција, за фаворизирање фирма и за милионски суми од јавни пари.

Уште посериозно е што станува збор за заштитни огради. Тоа не се украси покрај патиштата. Тоа е опрема директно поврзана со безбедноста во сообраќајот и со човечките животи.

Ако безбедноста на граѓаните била ставена на пазар за тендерот да заврши кај српска компанија, тогаш дали треба да чекаме нови трагедии како Ласкарци за институциите конечно да се разбудат?

Ако Основното јавно обвинителство за гонење организиран криминал и корупција молчи пред овие сериозни информации, тогаш прашањето што само по себе се наметнува е едноставно: дали Ислам Абази знае дека Обвинителството треба да постапува и по „допрен глас“, или чека да слушне што ќе му каже Али Ахмети?

Затоа бараме од Ислам Абази веднаш да отвори предмет и да ги провери сите информации поврзани со јавните набавки, заштитните огради и милионските суми што се споменуваат во јавноста.

Граѓаните имаат право да знаат дали јавните пари биле трошени законски и зошто била фаворизирана српска компанија.

ДУИ се лажни патриоти. За правата на Албанците галамат кога се во опозиција, а кога беа на власт правеа алаш-вериш со српски компании за целосно лични интереси.

Нема да дозволиме оваа тема да се затвори со молк.

Бараме Обвинителството да не губи време, туку веднаш да постапи и да ѝ соопшти на јавноста какви чекори ќе преземе.