Јермак се сретна со Виткоф во Њујорк

Шефот на кабинетот на украинскиот претседател Володимир Зеленски, Андриј Јермак, денеска потврди дека разговарал со специјалниот американски пратеник Стив Виткоф за неодамнешниот руски напад на Киев во кој загинаа 23 лица и за потребата да се изврши притисок врз Москва за постигнување мир.

– Отворени сме за директни преговори на ниво на лидери и подготвени сме да разговараме за најширок спектар на прашања. Сметаме дека е потребен глобален притисок за да се обезбеди Русија да биде вистински подготвена да се движи кон мир и, особено, да се одржат исклучително важни состаноци на лидерите за таа цел, напиша Јермак во објава на X, по состанокот во Њујорк.

Клучниот приоритет е да се унапреди вистинската дипломатија и да се обезбеди спроведување на сите договори постигнати на самитот во Вашингтон, смета Јермак и додаде дека Украина ги координираме нејзините напори.

Тој го информирал Виткоф „за воените злосторства што Русија секојдневно ги врши против градовите и заедници во Украина“.

– Особено, зборував за масовниот напад со ракети и дронови врз Киев, кој одзеде животи на 23 лица, вклучувајќи четири деца. За жал, Русија не успева да исполни ништо што е потребно за да се стави крај на војната и јасно ги одолговлекува непријателствата. Украина ја поддржува цврстата решителност на претседателот Трамп, како и на сите партнери, да се постигне траен мир што е можно поскоро. Украина ги поздравува сите мировни иницијативи што ги покренуваат Соединетите Држави. Но, за жал, секоја од нив е попречена од Русија, напиша Јермак.

Зеленски претходно денеска изјави дека по масовниот руски напад на Киев ноќта на 28 август, 23 лица загинале, 53 се повредени, а судбината на осум лица сè уште е непозната.