ЕСМ за понудената цена на струја: Корекцијата е поради енормното зголемување на цените на енергенсите на глобално ниво и нивната недостапност во грејната сезона
АД ЕСМ понуди цена на произведената електрична енергија од 48 евра за мегаватчас за периодот јули-декември 2022 година, седум евра повеќе од цената за претходното шестмесечје, јануари-јуни 2022 година кога изнесуваше 41 евра.
Како што информираат оттаму, корекцијата на цената е во контекст на енормното зголемување на цените на енергенсите на глобално ниво, како и нивната недостапност, особено во период на грејна сезона.
Притоа се додава дека, кога се анализира понудената цена од 48 евра за мегаватчас, треба да се земе предвид дека цените за електрична енергија на берзата HUDEX за периодот јули-декември 2022 година се движат меѓу 320 и 360 евра за мегаватчас.
„Доколку АД ЕСМ пресмета пазарна цена кон ‘ЕВН хоум’ тогаш крајната цена за граѓаните би била приближна до бројките од берзанските цени – наведуваат во соопштението.
За периодот јули-декември 2022, велат од ЕСМ, ќе ги обезбедат вкупните количини на електрична енергија кои му се потребни на „ЕВН хоум“, односно 100 проценти да ги покрие потребите на граѓаните и малите потрошувачи (законот за оваа година го обврзува ЕСМ за 60 отсто), како и целосно покривање на техничките загуби во системот на ЕВН Електродистрибуција и целосно покривање на техничките загуби во системот на МЕПСО.
„Исто така, ЕСМ се обврза да обезбеди и дополнителни 10 проценти енергија доколку ‘ЕВН хоум’ го побара тоа во текот на договорниот период – велат од ЕСМ.
Од ЕСМ посочуваат и дека поради префрлањето на потрошувачи од слободниот на регулираниот пазар, конзумот на „ЕВН хоум“ е зголемен за 27 проценти, (деловни субјекти, општини, јавно осветлување), и од тие причини, како што велат, АД ЕСМ го зголеми планот за производство на електрична енергија за 2022 година за 20 отсто од производството во 2021 година.
„Дополнителните потреби на „ЕВН хоум’ и на ЕВН Електродистрибуција ќе ги задоволиме со дополнителна набавка на јаглен за зголемување на производството од термоелектраните Битола и Осломеј, како и обезбедување доволни количини мазут за работа на ТЕЦ Неготино“,
посочуваат од ЕСМ.На вчерашниот тендер за набавка на електрична енергија за периодот јули-декември 2022 година, „ЕВН хоум“ како универзален снабдувач на електрична енергија доби само една понуда од ЕСМ
Како најповолен и единствен единствен понудувач на тендерот преку електронска аукција, АД ЕСМ му понуди на „ЕВН хоум“ купопродажна цена на електрична енергија од 48 евра за мегават-час, за покривање на 100 отсто од вкупно планираните количини.
За цената на електричната енергија на „ЕВН хоум“ во наредниот период ќе одлучува Регулаторната комисија за енергетика (РКЕ), а таа ќе зависи од повеќе влезни параметри, како што се – цената по која АД ЕСМ ја продава електричната енергија на „ЕВН хоум“, цената на преносниот систем-оператор МЕПСО, цената на операторот на пазар на електрична енергија МЕМО, како и цената на дистрибутивниот систем-оператор „Електродистрибуција“.