Еврокомесарката Јохансон: Западен Балкан не е засегнат од предлогот за суспендирање на безвизниот режим

„ЕУ опсервер“ денеска објави дека меѓу земјите членки на ЕУ циркулира интерен документ за да се овозможи враќање на визниот режим за земји чии граѓани не ги почитуваат своите обврски во рамките на договорите за негова либерализација

Еврокомесарката за внатрешни работи Илва Јохансон реагираше на документот објавен во „ЕУ опсервер“ утрово во кој се вели дека е доведен во прашање безвизниот режим со ЕУ за источните земји, јави МИА од Брисел.

Одговарајќи на новинарско прашање попладнево, Јохансон рече дека Европската комисија предложи алатка за суспендирање на безвизниот режим за земјите што не ги почитуваат своите обврски за реадмисија, но дека земјите од Западен Балкан не се засегнати.

„Имаме нова алатка за визниот кодекс, според кој Комисијата секоја година проценува како третите земји соработуваат за реадмисија и, ако тоа не го прават, предлагаме санкции за олеснетиот визен режим кон овие земји. Првпат Комисијата го презентираше летово и сега се процесира, но ниедна од земјите од Западен Балкан не се наоѓа во нашиот предлог“,изјави Јохансон.

Утрово „ЕУ опсервер“ објави дека меѓу земјите членки циркулира интерен документ за да се овозможи враќање на визниот режим за земји чии граѓани не ги почитуваат своите обврски во рамките на договорите за либерализација на визите.

Од Европската комисија велат дека повеќе детали за овој документ треба да се побараат од Советот на ЕУ каде што заседаваат земјите членки, но дека ваков предлог нема во Европската комисија.