Европски функционери очекуваат Иран да и испорача балистички ракети на Русија

Европски функционери очекуваат Иран да и испорача балистички ракети на Русија во најскоро време, потег што може да предизвика „итен одговор“ од украинските сојузници, изјавија за Блумберг извори запознаени со тоа прашање.

Иран и достави на Русија стотици беспилотни летала за време на двеиполгодишната војна против Украина, но потенцијалното снабдување со балистички ракети би претставувало „опасна ескалација“, изјавија изворите, кои сакаа да останат анонимни.

Изворите на Блумберг не сакаа да дадат проценки за видот и количината на балистичките ракети или периодот во кој тие би можеле да бидат испратени во Русија. Но, еден од надлежните изјави дека испораките би можеле да започнат многу брзо, односно за неколку дена.

Балистичките проектили летаат многу побрзо од крстосувачките ракети или беспилотните летала, што го отежнува нивното пресретнување и уништување. Покрај тоа, тие можат да носат значително поголем товар, што значи дека можат да направат многу поголема штета.