„ArtArea” е интермедијален фестивал што ја поттикнува и промовира современата парадигма на интегративно и интерактивно културно дејствување. Фестивалот ја пресретнува градската потреба за формирање и одржување зони на пресек на различните културно-уметнички полиња, во поглед на авторската работа и на рецепцијата на публиката, трудејќи се да воспостави силна и плодотворна врска меѓу одделните „соби” на културата.
Со тоа, како фестивалски тим сакаме да направиме видлив исчекор кон вмрежувањето на културната сцена и да ја поткренеме свеста за нејзината разнообразност, но и за можностите таа да прави нови и неочекувани преплети преку конкретни изведби, публикации, поставки и експерименти.
„ArtArea” е фестивал особено насочен кон откривањето на новото во урбаната култура и се труди да воспостави платформа за иновативно делување што потенцијално би ги збогатило културните содржини во градот и би привлекло нови учесници во живата градска култура.
Годинава фестивалот ќе се одржи во дворот на кафе-книжарницата „Буква” во центарот на Скопје, а на наше задоволство, оваа година фестивалот го препознаа и го поддржаа Креативна Европа, Министерството за култура на Северна Македонија и Градот Скопје, што е доказ за важната позиција што ја изгради фестивалот „ArtArea” во културната сфера.