ГАЛЕРИЈА: Филипче ги посети операторите каде што ќе се чуваат вакцините против Ковид-19

Дистрибутерите кои веќе се вклучени во системот на вакцинација, ги чуваат и пренесуваат останатите вакцини што се користат во земјава, ќе бидат задолжени и за вакцината против ковид-19.

Министерот за здравство Венко Филипче денеска ги посети овие операторите и порача дека е подготвена инфраструктурата за чување и диструбуција.

Во моментов, има фрижидери до минус 20 степени целзиусови, а дополнително ќе се набавуваат и до минус 70.

„Операторите во своите постоечки капацитети имаат комори и ладни соби од 0 до 8 степени целзиусови, како и фрижидери до-20 степени целзиусови, како и возила со ладилници како би го запазиле ’ладниот синџир‘ при дистрибуција на вакцините. Дополнително Министерството за здравство операторите ќе ги снабди со фрижидери до – 70 степени целзиусови кои во земјава ќе пристигнат кон средината на јануари-соопштија од Министерството.

Вакцинацијата, најавуваат здравствените власти, ќе се врши во веќе постоечките вакцинални пунктовите односно во здравствените установи низ државата. Сите вакцини против ковид-19, порачуваат, се безбедни и ќе бидат бесплатни за граѓаните.

Двете вакцини за кои е поднесено барање за одобрување во Европската агенција за лекови (ЕМА), а кои треба да пристигнат во земјава, треба да се чуваат на ниски температури. Вакцината на „Модерна“ треба да се чува на температура од-20 степени целзиусови, додека онаа на „Фајзер“ и БионТек“ на-70.