Филипче: Комисијата за заразни болести не одредува термин, туку протокол за одржување на изборите

Министерот за здравство Венко Филипче денеска изјави дека од Комисијата за заразни болести не било побарано да каже термин, туку протокол за одржување на изборите.

– Тоа што се бараше од Комисијата за заразни болести и Министерството за здравство во однос на изборите е протокол за одржување на избори, односно тој медицински-епидемиолошки дел. Во ниту еден момент не се бараше од нас, ниту пак може да се бара термин за одржување на избори, рече Филипче одговарајќи на новинарско прашање на прес-конференција во Владата, додавајќи дека тие се надлежни да кажат во кој период на епидемиолошката крива сме, што се очекувањата и врз основа на што ги темелат, за да се одреди датумот на избори.

Тој вели дека новодијагностицираните се луѓе кои не ги почитувале мерките на превенција во момент кога имаше и полициски час.

Во моментов, додава Филипче, сосем е јасна епидемиолошката состојба и во однос на кластерите и во однос на начините на трансмисија.

– Тоа не значи дека нема да воведеме повторно некакви мерки, сега се размислува повеќе и за некои локализирани мерки и во насока на тоа ќе ги пратиме бројките и ќе ги правиме и анализите, рече Филипче.

Back to top button
Close