Осомничени се три лица, од кои двајца вработени во Управата за водење матични книги, а едниот сопственик на фирмата „Новатек ИНВ“ од Скопје која го добила тендерот. Осомничена како правно лице е и фирмата.

„Спротивно на начелото за економичност, ефикасност и ефективно користење на јавните средства, во текот на 2021 година изработиле тендерска документација со дискриминирачки и несразмерни услови за квалитативен избор за јавна набавка на услуги за дигитализација на матичните книги и јавна набавка на компјутерска опрема и за четвртопријавеното правно лице ’Новатек ИНВ‘ ДООЕЛ Скопје прибавиле корист – право да учествува во постапка за јавна набавка и да склучи договори на вкупен износ од 35 621 240 денари (околу 580 илјади евра)“,соопштија од УФП.

Според финансиската полиција, ваквата набавка на компјутерска опрема била по далеку повисоки цени од реалните што се на пазарот и на тој начин била предизвикана штета на Управата за водење матични книги во вкупен износ од 2 836 260 денари (околу 46 000 евра).

Дополнително, УФП тврди и дека двајцата вработени во Управата склучиле договор за техничка поддршка при процесот на внесување податоци со истата фирма иако за вакво нешто веќе имало постоечки договор со друга компанија. Договорот предвидувал месечен паушал од 359 507 (околу 5 800 евра).

„Без да постои реална потреба кон Управата се фактурира за иста услуга два пати, еднаш од страна на ’Новатек ИНВ‘ и еднаш од страна на другиот правен субјект, со што е предизвикана штета на Управата за водење на матични книги во вкупен износ од 2 157 042 денари (околу 35 илјади евра)“,велат од Финансиската полиција.

Откако оттаму објавија дека е поднесена кривична, од Министерството за правда, под чија надлежност е Управата за водење матични книги, посочија дека досега немаат добиено известување дека има пријава против вработен, но откако ќе бидат известени, ќе одлучат за мерки за овие лица.