Фондот за здравство најави мерки: Околу 477.000 луѓе имаат бесплатно здравствено осигурување, а работат во сива економија

Започнат е процес на преоценување на критериумите за здравствено осигурување, на иницијатива на Фондот за здравствено осигурување на Македонија, а со одлука на Владата на Македонија.

Денес е Светскиот ден на штедење: Македонските граѓаните во банките чуваат 6,9 милијарди евра, но сѐ повеќе инвестираат и во акции

„Македонија има еден од највклучувачките закони кои обезбедуваат основ за здравствено осигурување за секој еден граѓанин, бидејќи целта е универзално здравствено осигурување за сите,“ соопшти директорот на Фондот, Сашо Клековски.

Во моментов во Фондот има 1.845.007 осигуреници.

„Целта на преоценувањето е да се намали ризикот од злоупотреба и посебен фокус е основот за осигурување за ‘лица со пониски и повисоки примања, а не се вработени (невработени лица)’. По тој основ се осигурани околу 477.000 луѓе,“ соопшти Фондот.

Целта за овој основ е да се опфатат не само активните баратели на работа, се вели во соопштението, туку и лицата кои не се формално вработени. Ризикот од злоупотреба, додава Фондот, се луѓе кои неформално работат во сива економија и луѓе кои живеат или приходите им се во странство.

И едните и другите немаат регистрирани приходи во земјата и се квалификуваат за бесплатна здравствена заштита, се наведува во соопштението.

„Поради тоа Фондот трпи штети и по основ на приходи за здравствено осигурување и по основ на повеќе исплатени капитации зашто бројот на осигуреници е основ за плаќање на матичните лекари. Основниот проблем е сивата економија и затоа процесот го води работна група која покрај Фондот го вклучува Министерството за здравство, Министерството за финансии и Управа за јавни приходи, а по потреба се консултира Министерството за внатрешни работи,“ додава Клековски.