ФОТО: Од Токио до Њујорк, масовни протести против руската инвазија
Протест во Лондон/ Фото EPA-EFE/NEIL HALL
Демонстрантите излегоа на јавните плоштади и пред руските амбасади во градовите од Токио до Тел Авив и Њујорк за да ја осудат руската инвазија на Украина. Оние пак кои се обидоа да протестираат низ улиците на Русија, беа уапсени.
Најраниот протест се случи пред руската амбасада во Вашингтон околу 1 часот по полноќ, неколку часа откако Путин ја соопшти инвазијата.
Десетици демонстранти во главниот град на САД вееја украински знамиња и извикуваа „Стоп за руската агресија!“
Во Лондон, стотици демонстранти, од кои многу Украинци, а некои плачеа, се собраа пред Даунинг стрит, домот на премиерот, барајќи од Британија да стори повеќе.
„Ни треба помош, ни треба некој да не поддржи“, велеа тие. „Украина е премала и притисокот е преголем“.
Во Париз, еден демонстрант изјави за Ројтерс: „Чувствувам дека сме во многу опасен момент за целиот свет“.
Во Мадрид, шпанскиот актер, оскаровецот Хавиер Бардем, номиниран за уште една награда за Оскар оваа година, им се придружи на околу стотина демонстранти пред руската амбасада.
„Тоа е инвазија. Тоа го крши основното право на Украина на територијален суверенитет, меѓународното право и многу други работи“, рече Бардем.
Џиновско знаме беше пренесено низ Тајмс Сквер на Менхетен од толпа од неколку стотици демонстранти.
Во швајцарскиот главен град Берн, стотици луѓе се собраа, држејќи украински знамиња и извикувајќи „Мир за Украина!“.
Протести и низ Азија
Други демонстрации се одржаа во Бејрут, Тел Авив, Даблин и Прага.
Повеќе протести беа закажани за подоцна во текот на денот во американските градови Хјустон и Денвер, според објавите на социјалните мрежи.
Во самата Русија, демонстрантите му пркосеа на официјалното предупредување кое експлицитно се закануваше со кривично гонење, па дури и со затворска казна за оние кои повикуваат или учествуваат на протести.
Стотици се собраа во градовите меѓу кои Москва, Санкт Петербург и Екатеринбург, извикувајќи слогани како „Не на војната!“ и држејќи импровизирани знаци.