Франција ќе ги зголеми платите на здравствените работници

– Француската Влада одобри зголемување на платите на здравствените работници во вкупна вредност од осум милијарди евра, откако властите ја истакнаа нивната улога во борбата против коронавирусот.

Договорот, кој беше потпишан со синдикатите по неколкунеделни преговори, предвидува зголемување на платата за 183 евра месечно, јави Би-Би-Си.

Здравствените работници одржаа неколку протести, барајќи повисоки плати и повеќе инвестиции во болниците.

Досега во Франција се пријавени повеќе од 200.000 случаи на заразени со коронавирус и повеќе од 30.000 смртни случаи, поради што е една од најзагрозените европски земји.