Француските социјалисти се закануваат, или данок за богатите или недоверба на владата

Француската социјалистичка партија поднесе скратена верзија на предлогот за данок на богатство како можен компромис во дебатата за буџетот што се заканува да ја собори малцинската влада на премиерот Себастијан Ле Корнеј, објави Блумберг.

Предложената мерка би обезбедила лицата со богатство поголемо од десет милиони евра да плаќаат данок еднаков на најмалку три проценти од нивното богатство, со ослободувања за „иновативни“ и семејни компании. Сличен е, но малку помал од, данокот Цукман, кој е дизајниран како данок од два проценти на богатство над 100 милиони евра, без ослободувања.

Централно-левичарската партија додаде амандман на законот за буџетот за 2026 година што би создал изменета верзија на данокот за кој долго време се залагаат, именуван по економистот Габриел Цукман.

Француската влада досега се спротивставуваше на обидите за додавање на сеопфатен данок на богатство, но Социјалистичката партија има огромно влијание во парламентот бидејќи нејзините пратеници имаат доволно места за да победат во гласањето за недоверба.

Откако го принуди Ле Корнеј да ги суспендира пензиските реформи во замена за воздржување од гласање за недоверба претходно овој месец, Социјалистичката партија сега бара поголеми отстапки, а вчера лидерот на социјалистите, Оливие Форе, изјави дека ќе се обиде да ја собори владата уште следната недела ако таа не прифати повисоки даноци за богатите во буџетот за 2026 година.

Министерот за финансии, Роланд Лескир, изјави дека е „апсолутно неопходно“ да се најде компромис за буџетот, но неговата канцеларија одби да коментира за амандманот на социјалистите, за кој треба да се дебатира подоцна во текот на денот.

Извор: nezavisen.mk