Галуп со анкета во Бугарија: ГЕРБ е прв, „Има таков народ“ падна на четвртото место
Според најновата анкета на Галуп, доколку изборите за Националното собрание се одржат во првата половина на септември, ГЕРБ -УДФ ќе добие 22,5 отсто од гласовите, а БСП – 16,1 отсто, „Демократска Бугарија“ е трета со 15,8%, „Има таков народ“ е четврта сила со 15,5%, по што следуваат Движењето за права и слободи со 11,9%, а последни што би го исполниле цензусот е „Стани, Бугарија! Доаѓаме!“ со 4,8%.
Истражувањето е спроведено од 2 и 10 септември, „лице в лице“, на примерок од 1 007 граѓани.
Бугарските медиуми посочуваат коментираат дека истражувањето е спроведено пред поранешните привремени министри Кирил Петков и Асен Василев да ги објават своите намери да се кандидираат на изборите. Двајцата се меѓу политичките фигури во Бугарија со личен рејтинг со најбрз раст.
Исто така, се посочува и рејтингот на Бојко Борисов, на пример, кој според оваа анкета е 15,1% (што е историски минимум за него). За разлика од него, Кирил Петков има рејтинг од 33,8%, со што е меѓу политичарите со најголема доверба. На врвот е Румен Радев кој ужива доверба од 65,5% од анкетираните овој месец.
Во однос на излезноста, анкетата на Галуп покажува дека 47,1% од анкетираните се изјасниле дека сигурно ќе гласаат на парламентарните избори, 23,8% веројатно би гласале, но сепак не можат со сигурност да кажат. Ова, во бројки би значело дека повеќе од 3 милиони Бугари најверојатно ќе гласаат, а во анкетата не се вклучени гласовите од странство.
Ова е втора анкета во изминатиот краток период која покажува дека ГЕРБ ужива најголема доверба кај граѓаните. На претходната анкета „Има таков народ“ на Слави Трифонов беше трета, а на оваа е четврта политичка партија.
Претседателот Радев за 14 ноември ги закажа претседателските и парламентарните избори, откако по парламентарните избори во јули, пропаднаа трите обиди за формирање влада.
Вчера, Радев повторно го назначи пензионираниот генерал Стефан Јанев (61) за премиер на техничката влада, која е втора по ред.