Гаши: Оваа кампања беше најдобар пример за демократија
Претседателот на Собранието на Република Северна Македонија, Африм Гаши, денес го оствари своето граѓанско право, гласајќи на локалните избори 2025.
Во својата изјава за медиумите по гласањето, претседателот Гаши им честиташе на граѓаните и на сите политички фактори за водењето на достојна и безинцидентна кампања, потенцирајќи дека изборниот процес досега поминал на примерен начин.
„Сметам дека оваа кампања беше еден од најдобрите примери како се практикува демократијата во нашата држава. Досега немавме ваква кампања. Се надевам дека и денешниот ден ќе заврши во иста демократска и мирна атмосфера,“ изјави претседателот Гаши.
Тој, исто така, ги повика надлежните институции да продолжат да бидат на ниво на задачата до завршувањето на изборниот процес, спроведувајќи го на најчесен и најодговорен можен начин.
На крај, претседателот на Собранието ги повика граѓаните да излезат и слободно да гласаат, со целосна доверба и убеденост во својата иднина во наредните четири години, нарекувајќи го овој ден „празник на демократијата“.
