Гаши по денешните пратенички прашања: Злоупотребата на процедуралните забелешки мора да сопре!

Претседателот на Собранието, Африм Гаши, во своето гостување на МРТ се осврна на динамиката и процедуралните опструкции за време на седницата за пратенички прашања, како и на прашањата поврзани со употребата на албанскиот јазик во законодавниот дом.

Гаши истакна дека координациите и честите паузи за време на седница за пратенички прашања не се вообичаена практика, посочувајќи дека процедуралните обраќања сè почесто се користи за политички блокади наместо за реална заштита на процедурата, објави 4news.mk

Претседателот на Собранието појасни дека деловничката можност за процедурално обраќање е замислена како механизам преку кој координаторите и пратениците ќе му укажат на претседателот или на службите доколку сметаат дека е прекршен Деловникот:

„За жал, тој механизам веќе станува политички инструмент и се злоупотребува. Ќе треба да најдеме начин да го заокружиме во смислата во која е содржана во Деловникот – координаторите да го користат секогаш кога сакаат да укажат на процедура, а не за искажување политички ставови или за блокирање на седниците“, порача Гаши.

Тој подвлече дека денот за пратенички прашања е првенствено за опозицијата, која според односот два спрема еден има најголем простор да поставува прашања и да ја држи Владата одговорна:

Надзорна функција: Целата Влада, предводена од премиерот, беше присутна за да одговара пред пратениците и граѓаните, што претставува клучна надзорна улога на Собранието.
Апел до опозицијата: Наместо трошење на времето со чести паузи и процедурални истапувања, фокусот треба да биде врз директното испитување на Владините политики.
Одговарајќи на прашањата за наводите дека одредени акти на албански јазик немале негов потпис, Гаши демантираше такви тврдења:

„Не, спротивно е тоа, објави 4news.mk Во Собранието албанскиот јазик се почитува максимално, точно онака како што е предвидено со Законот“, заклучи претседателот на Собранието.

Денешната седница која беше посветена на поставување пратенички прашања заврши предвреме откако по неколкуте прекини, координаторот на пратеничката група на движењето ЗНАМ, Бобан Карапејовски, побара нова едночасовна пауза поради тоа што како што рече, правото на процедурална забелешка во текот на денот било апсолутно злоупотребено, што довело до непотребно кревање на тензиите и политизирање на целата работа во Парламентот. Поради ваквото барање, потпретседателката на Собранието, Весна Бендевска, констатираше дека со паузата ќе се излезе надвор од рамките на редовното работно време кое трае до 18 часот, по што официјално ја затвори седницата.

Потпретседателката на Собранието, Весна Бендевска, ја затвори 113. седница откако пратеничката група на ЗНАМ побара пауза поради злоупотреба на процедурите, што го проби предвиденото работно време