Генерал Замир предупредува: Планот за освојување на Газа ќе доведе до „воена влада“

Началникот на Генералштабот на Израелските одбранбени сили, генерал-потполковник Ејал Замир, предупреди дека планот за освојување на градот Газа ќе го вклучи Израел во целосна окупација на палестинската енклава.

-Одите кон воена влада. Вашиот план нè води таму. Разберете ги импликациите. Вашата одлука да го освоите градот Газа ќе доведе до освојување на бегалските кампови во централна Газа, а потоа тоа ќе биде воена влада, бидејќи нема да има друго тело кое може да ја преземе одговорноста за населението, предупреди Замир на состанокот на кабинетот за следните чекори во војната во Газа, одржан синоќа, пренесе порталот Унет Њуз (Ynet News).

Според израелскиот портал, секретарот на кабинетот Јоси Фукс возвратил, велејќи дека веќе е донесена одлука дека нема да има воена влада во Газа.

Министерот за национална безбедност Итамар Бен Гвир рече дека наместо воена влада, треба да се охрабрува „доброволната емиграција“.

„Разберете ги импликациите“, повторил Замир, на што министерот за финансии Безалел Смотрич одговорил: „Донесовме одлука“.

Во тој момент, според Унет, Бен Гвир повикал на гласање за делумниот договор за заложниците за да докаже дека мнозинството од кабинетот е против него.

И израелскиот премиер Бенјамин Нетанјаху го одбил генералот, велејќи дека нема договор на маса и ефикасно отфрлајќи го фазниот договор за заложници предложен од медијаторите, на кој Хамас се согласи претходно овој месец.

Израел соопштува дека ќе разгледа само сеопфатен договор во кој Хамас ќе го положи оружјето и ќе ги ослободи сите заложници