Гласините за влошената здравствена состојба на Трамп продолжуваат и покрај неговите негирања

Ретуширани слики, фотографии извадени од контекст, гласини според кои американскиот претседател Доналд Трамп е тешко болен, па дури и мртов, кружат на интернет во последните денови, и покрај неговите негирања во вторникот.

На прес-конференција во Белата куќа, Трамп (79) изјави дека гласините за неговото лошо здравје што се појавија минатата недела, кога имаше невообичаено малку појавувања во медиумите, се „лажни вести“.

До петок, на платформата X имаше околу 104.000 споменувања на хаштагот „Трамп е мртов“ со вкупно 35,5 милиони прегледи, според анализата на NewsGuard, организација за борба против дезинформации.

Некои објавија мапи на интернет кои наводно прикажуваат затворени патишта во близина на Националниот воено-медицински центар „Волтер Рид“ во близина на Вашингтон, како доказ дека Трамп се лекува таму од сериозна болест. Но, немаше веродостојни информации за затворањето на тие патишта.

Други објавија фотографија од амбулантно возило пред Белата куќа на интернет, тврдејќи дека е направена минатиот месец, но станува збор за фотографија од 2023 година, кога претходникот на Трамп, Џозеф Бајден, беше на функција, пишува „Њузгард“.

Некои, тврдејќи дека Трамп е мртов, објавија фотографии од знамиња спуштени на половина копје во Белата куќа, кои всушност беа поставени насекаде минатата недела како почит кон жртвите од пукањето во училиштето во Минеаполис.

Други објавија зумирана фотографија од лицето на Трамп, тврдејќи дека виделе длабока брчка над неговото око што укажува дека неодамна доживеал мозочен удар. Но, Њузгард тврдеше дека тоа не е случај на оригиналната фотографија и заклучи дека објавената фотографија е дигитално ретуширана од вештачка интелигенција.

Дезинформациите што се чини дека потекнуваат од анти-Трамп профили на X, Bluesky и Instagram продолжија дури и кога Трамп напиша на својот Твитер профил овој викенд: „Никогаш не сум се чувствувал подобро во мојот живот“.

Лажни информации се шират дури и по вчерашната прес-конференција на Трамп, каде што тој јавно ги отфрли гласините за неговото здравје.

Здравјето на американските претседатели секогаш внимателно се следи, објавува агенцијата Франс Прес.

За време на последната претседателска кампања, Доналд Трамп, најстариот избран претседател во САД, тврдеше дека демократите го прикриваат влошувањето на менталното и физичкото здравје на претседателот Џо Бајден, кој во јануари имаше 82 години кога ја напушти функцијата.