Го лажела убиецот дека е бремена за да не ја убие, сведочела жената од таксито кое го киднапираше масовниот убиец Урош Блажиќ

фото блиц рс

Жената која беше во таксито што го киднапираше убиецот Урош Блажиќ по масакрот во Младеновац денеска беше сослушана пред Вишото јавно обвинителство во Смедерево, каде кажа дека ја измислила бременоста откако убиецот го киднапирал возилото, бидејќи таа се плашела дека ќе ја убие, објави Блиц.

Како што пренесува српскиот медиум, таа раскажала дека бременоста ја измислила откако Урош Блажиќ го запрел таксито во кое била патничка, за да се спаси. Според нејзините тврдења, Урош Блажиќ и се заканувал со смрт на неа и на таксистот.

– Таа рече дека Блажиќ имал две бомби со себе и им се заканил дека ќе ги фрли. Решила да го излаже дека е бремена за да се спаси и себе и таксистот – вели изворот на Блиц кој е запознаен со истрагата.

Исто така, таа денеска одговараше на прашања во колку часот Блажиќ влегол во автомобилот, како и каде влегол во возилото, да опише како изгледал, како и да каже дали го видела оружјето на Блажиќ и кое.

„Таа рече дека на 4 мај се договорила со нејзиниот вереник да се качи со такси од Смедерево до неговата куќа во селото Богдановица кај Уб. Таксистот нешто пред 23 часот дошол да ја земе со „форд фокус“, па таа седнала на задното седиште, зад совозачкото седиште и се упатиле кон Уб. Возеле речиси половина час до исклучувањето на автопатот, кон рампата во Мали Пожаревац“ – изјавил извор на „Блиц“, близок до истрагата.

На рампата, според Ј.А., пред нивното имало други две возила, а позади немало автомобил.

Според информациите, откако таксистот, девојката и Урош Блажиќ тргнале, по негова наредба се исклучиле од главниот пат за да избегнат полициски блокади.

Девојката не можела да прецизира по кои патишта се возеле, но, колку што се сеќава, станувало збор за селски патишта.

„Возејќи, Урош нервозно ја вртеше бомбата во раката. Од време на време вадеше и друга бомба од чантата. Возеле така, според зборовите на Ј.А., околу два часа, а таа размислувала само да излезе жива. Во текот на возењето неколкупати и заѕвонил мобилниот телефон, и се јавил вереникот, но не смеела да му одговори“ – раскажал неименуван извор.

Кога конечно стигнале, вознемирена Ј.А истрчала од таксито и влегла во куќата на нејзиниот вереник, а тој останал да му плати на таксистот.

„Ј.А рече дека се плашела како ќе реагира Урош додека нејзиниот вереник му плаќал на таксистот за возење. Кога младото момче конечно влегло во куќата, Ј.А. му раскажала за тортурата низ која поминала. Размислувале веднаш да ја известат полицијата, но, како што објаснила се плашеле да не се врати Урош, бидејќи знае каде е куќата на нејзиниот вереник, и дека ќе ја убие неа и вереникот и неговото семејство, кои живеат во тој дом“ – истакал соговорникот.

Сослушувањето на 16-те сведоци на масакрот е закажано за оваа недела. Нивните изјави треба да ги разјаснат сите околности на петкратното убиство во Мали Орашје и тројното убиство во Дубона.

Минатата недела сведочеа шест очевидци. Во истрагата за масовното убиство, освен Урош, уапсени се и неговиот татко Радиша Б.(55) и вујко Горан Г.(49). Двајцата се товарат за недозволено оружје кое полицијата им го пронашла во домовите и им е одредена мерка притвор до 30 дена.

Инаку, вчера бил сослушан и вереникот на преплашеното девојче, кој раскажал како ноќта меѓу 4 и 5 мај ја чекал Ј.А пред својата куќа, бидејќи бил загрижен бидејќи таа не му се јавувала на телефонот.

„Кога го видел таксито како застанува пред неговата куќа и Ј.А панично истрчува од автомобилот, му паднал камен од срцето бидејќи била жива и здрава. Додека таксистот ја плаќал сметката, на задното седиште во таксито видел човек, но не и бомбата, ниту пак се посомневал дека се работи за масовен убиец, по кој во тој момент трагале 600 полицајци. Дури кога влегол дома, вереницата му кажала што доживеала и како се сетила да го излаже Урош дека е бремена за да се спаси“ – забележува соговорникот.

Според планираното, утре во обвинителството треба да даде исказ и таксистот.

Да потсетиме, на 4 мај во текот на вечерта Урош Блажиќ го започна својот крвав поход. Убил пет селани во селото Мало Орашје, од кои најмладата жртва има 15 години. Потоа продолжил кон селото Дубона, каде убил полицаец, неговата сестра и нивниот пријател. Уапсен е следниот ден во раните утрински часови во близина на Крагуевац, откако киднапирал таксист и му се заканил дека ќе го убие доколку не го вози.