Груевски: Камчев жртвуваше три стана, а Алек два стана и земјиште, за да си ја купат слободата и ме наместат
Пред утрешната објава на пресудата за случајот “Плацеви на Водно”, екс премиерот Никола Груевски, се јави со нов статус од Бидимпешта, за кој најавува дека му е најверојатно последен на оваа тема.
Тој дава свое видување за сите сведоци кои се појавија во судница, додавајќи дека прави резиме на сите факти, лаги, нелогичности, игри, местенки…
Во долгото обраќање, Груевски му посветува и дел на бизнисменот Орце Камчев и на сведокот Александар Ивановски.
-Идејата на овој договор во последен момент е и покрај промената на изјавата на Јордан Камчев насочена против мене, истиот да жртвува три негови и на неговиот зет стана на Водно, како што Александар Ивановски својата слобода одлучи да ја купи со два помали стана и едно земјиште од 2.700мкв. Се заедно тоа да се заплени и да се прикаже како запленет мој имот, поточно како имот кој требало да ми припадне, а со цел од истото владејачката партија да прави политичка пропаганда, вели Груевски.
Тој додава дека македонското судство е пред нов испит и предизвик.
-Тој не би постоел ако власта ги остави судиите да судат според доказите или ако се охрабрат да и се спротистават, бидејки тие знаат што се докази а што не. Дали ќе ги остави, или дали ќе се охрабрат да се спротистават ќе се види скоро, вели бегалецот од Будимпешта.