Хакан Фидан: Газа е Палестина и мора да остане дом на палестинскиот народ
Турскиот министер за надворешни работи Хакан Фидан изјави дека не смее да се дозволи раселување на Палестинците од Газа и нагласи дека западниот свет сè повеќе зазема позиција против израелските дејствија.
На состанокот на Организацијата за исламска соработка (ОИС) во Џеда, Саудиска Арабија, Фидан зборуваше во својство на претседавач, бидејќи Турција во моментов ја има ротационата претседателска улога.
– Јасно е дека Израел не сака мир, туку сака да го избрише палестинскиот народ од Газа. Не смееме да го дозволиме тоа. Газа е Палестина и припаѓа на палестинскиот народ. Мора да имаме гаранции дека ќе останат таму и дека повторно ќе ја изградиме Газа, рече Фидан.
Тој подвлече дека заедничките напори на ОИС и Арапската лига ја зголемиле меѓународната поддршка за Палестина, додавајќи дека Франција и Канада веќе се изјасниле дека се подготвени да ја признаат палестинската држава.
Фидан предупреди дека доколку огнот во Газа не биде запрен наскоро, Израел ќе ги засили своите окупациски планови. Како следен чекор, тој посочи потреба од зајакнување на палестинските институции со финансиска и техничка поддршка, како и „иницирање процес за прием на Палестина во Обединетите нации“.
– Признавањето на Палестина стана иреверзибилен процес, но тоа не е доволно. Ни треба координиран притисок за Израел да прифати трајно решение, нагласи шефот на турската дипломатија.
