Хезболах вели дека ќе продолжи со отпорот и покрај санкциите на САД

„Хезболах“ денеска соопшти дека ќе продолжи со својот отпор против Израел и покрај новите санкции што САД ги воведоа врз либанското исламистичко движење.

Министерството за финансии на САД вчера го смени статусот на „Хезболах“ во американското законодавство и ја означи организацијата како „дејствува во служба на иранскиот режим“.

Во 1997 година Вашингтон го прогласи Хезболах за „странска терористичка организација“, а во 2001 година – „меѓународна терористичка организација“.

Санкциите објавени вчера се насочени кон десет лица кои се дел од мрежата за пренос на средства на Хезболах и кои веќе неколку пати биле санкционирани од САД.

„Сите овие неправедни санкции и класификации нема да не оттргнат од патот на отпорот и борбата за правото на Либан и Либанците да ја бранат својата територија, својот суверенитет и своите ресурси“, се вели во денешното соопштение на Хезболах.