Хрватски медиуми: Хрват окривал воени тајни на Србинка за Српска листа во Косово

НАТО потврди дека „многу сериозно го сфаќа“ апсењето во Загреб на хрватски офицер кој служел во мисијата на Алијансата во Косово (КФОР) и неговa соучесничка, државјанка на Србија, обвинети за „шпионажа“.

„Ги сфаќаме овие обвинувања многу сериозно. Безбедноста на персоналот на КФОР и интегритетот на информациите класифицирани како тајни се од највисок приоритет“, изјави функционер на НАТО во писмен одговор до француски медиуми.

Истражниот судија на Окружниот суд во Сплит одреди едномесечен притвор за 54-годишен пилот на хрватските воздухопловни сили (ХВС) од Сплит и неговата партнерка (46), српска државјанка која живее во Косово, под сомнение за шпионажа, објави обвинителството на 28 август.

Државното обвинителство на Хрватска објави дека е утврдена тајнос на целата истрага, па затоа не се споменати деталите од постапката, туку само одлуката за одредување притвор, возраста и националноста на осомничените.

Хрватските медиуми пишуваат дека постојат сомнежи дека воениот пилот Ј.И. ѝ оддавал тајни на својата партнерка А.М., социолог од Косовска Митровица, а таа ги испраќала во партијата Српска листа.

Кон крајот на јули, тие биле уапсени на Вис во Хрватска, каде што биле на одмор, објавија вчера хрватските медиуми. Пилотот бил ослободен, а српската државјанка требало да биде протерана од Хрватска, со забрана од 10 години за влез во државата.

Медиумите во Хрватска наведуваат дека во меѓувреме, со проверка на нивните мобилни уреди и комуникации, истражителите пронашле компромитирачки пораки што ги натерале да се посомневаат во меѓународна шпионажа.

Приведената жена, како што објавија медиумите, наводно работи за германска организација и била пријавена за собирање податоци што ѝ ги дал воен пилот од Сплит, кој поминал извесно време на Косово како член на хрватскиот контингент како дел од КФОР во последните три години.

Според хрватските медиуми, станува збор за пилот на хеликоптер кој служел во КФОР и српски социолог од Косово, кои според извештаите се во љубовна врска.

И според хрватскиот претседател Зоран Милановиќ, врховен командант на армијата, истрагата започната врз основа на извештај на воената полиција се однесува на сомневања за кривично дело шпионажа. Извештајот е против „офицери на хрватските вооружени сили за шпионажа“.