Хунтата во Мјанмар објави потерници во дневниот печат прoтив јавни личности кои застанаа зад протестите

– Владеачката воена хунта во Мјанмар во дневниот печат објави потерници против повеќе јавни личности и со тоа ја засили својата кампања против познатите личности од земјата кои ги поддржуваат протестите, и притоа ги предупреди медиумите да не известуваат за нивната работа, бидејќи во спротивн ќе бидат кривично гонети.

Овој потег следи по повеќенеделното засилено насилство од страна на безбедносните сили за сузбивање на уличните протести во врска со државниот удар со кој беше соборена демократската влада на премиерката Аунг Сан Су Чи.

Списоци со актери, музичари и други влијателни јавни личности во неделата и вчера беа објавени во весникот „Global new light“ во кои тие се обвинуваат за кршење на членот 505 (А) од Кривичниот законик за „ширење вести што влијаат врз стабилноста на државата“ , за што се предвидува казна до три години затвор.

Весникот објави и фотографии на 20 јавни личности, со нивните лични податоци, местото на раѓање и нивните профили на социјалната мрежа Фејсбук.

Документот протече од Министерството за информации, во кој се предупредуваат медиумските куќи да не објавуваат информации за професионалните ангажмани на јавните личности кои се наоѓаат на списокот на оние кои ги поддржуваат протестите, бидејќи во спротивно тие самите ќе се соочат со кривично гонење.

Во февруари, веднаш по воениот удар, обвинети беа неколку актери и режисери, но кампањата против јавните личности кои ги поддржуваа протестите се интензивираше минатата недела кога една телевизиска станица контролирана од воените власти издаде потерници. Досега на ваквите списоци има најмалку 60 лица.