Инспекторатот изрече казни за десет нелегални отпади во Струмица и Куманово
Државниот инспекторат за животна средина направи контроли во Струмица и Куманово и откри десет нелегални отпади, по што им изрече парични казни на граѓаните кои ги создале и ги задолжи да ги расчистат депониите.
Станува збор за приватно земјиште на кое тие собирале отпаден метал од електрична и електронска опрема, како и автомобилски школки.
„Во Струмица е спроведена опсежна акција на осум локации од страна на државен инспектор за животна средина, инспектор по економски криминал од МВР, комунален инспектор и овластен инспектор за животна средина во Општина Струмица и по утврдување на незаконско собирање, складирање и селектирање на отпад на приватно земјиште, изречени се соодветни санкции. Во Куманово надзорот е извршен од страна на државен и овластен општински инспектор и казнети се две физички лица“,
велат од Државниот инспекторат.
Оттаму најавуваат дека ваквите акции ќе продолжат во сите општини во кои на незаконски начин се постапува со отпад.
