Иран тврди дека се здобил со тајни документи поврзани со израелската нуклеарна програма

Иранските разузнавачки служби се здобиле со „стратегиски и чувствителни документи“ што му припаѓаат на Израел, вклучително и материјали поврзани со израелските нуклеарни проекти и постројки, соопшти иранската државна телевизија, повикувајќи се на неименувани извори.

Во извештајот не се наведува како Иран дошол до овие документи, ниту се открива нивната точна содржина.

„Разузнавачките служби на Исламската Република Иран прибавија голем број стратегиски и чувствителни информации и документи поврзани со Израел, вклучувајќи илјадници документи за нуклеарни проекти и постројки“, се наведува во кусото соопштение.

Овие тврдења доаѓаат во контекст на засилени тензии околу иранската нуклеарна програма, која израелските власти ја сметаат за егзистенцијална закана. Според западните земји, предводени од САД, и Израел – кој се смета за единствена нуклеарна сила на Блискиот Исток – Иран има амбиции да развие нуклеарно оружје, иако Техеран тоа упорно го негира, тврдејќи дека програмата е наменета исклучиво за мирољубиви цели.

Израелскиот премиер Бенјамин Нетанјаху повеќепати изјави дека е подготвен за воена интервенција против иранските нуклеарни капацитети.

Иран и Израел веќе подолго време водат скриена војна, при што Техеран редовно апси осомничени шпиони, а Израел е обвинет за атентати и саботажи поврзани со иранската нуклеарна програма.

Минатата година, Иран двапати лансираше ракети и дронови кон израелска територија – нешто што ретко се случуваше претходно – тврдејќи дека тоа е одмазда за израелски напад врз иранскиот конзулат во Сирија.

Техеран најави и одмазда за убиството на поранешниот лидер на Хамас, Исмаил Ханија, на иранска територија, за што Израел ја презеде одговорност, како и за смртта на лидерот на Хезболах, Хасан Насрала, кој беше убиен во израелски напад во Либан.