Ирански амбасадор: Иран ќе ги гаѓа американските бази во Европа „доколку е потребно“
Иранскиот амбасадор во Шпанија, Реза Забиб, упати остра порака до меѓународната јавност, предупредувајќи дека воените капацитети на САД на европско тло не се недопирливи.
„Иран ќе нападне која било американска база во Европа доколку е потребно. Ние сме земја способна да реагира на секоја закана“, изјави амбасадорот Забиб.
Како директна последица на овие закани, шпанскиот министер за внатрешни работи веднаш нареди подигнување на нивото на безбедност и зголемен надзор низ целата земја.
Мадрид повлече црвена линија за САД
Оваа ескалација доаѓа во период на дипломатско „заладување“ меѓу Мадрид и Вашингтон. Шпанија претходно официјално одби да им дозволи на Соединетите Американски Држави да ги користат заедничките воени бази на нејзина територија за директни напади врз Иран.
Оваа одлука ги принуди САД да повлечат неколку воени авиони од типот KC-135 (авиони за полнење гориво во воздухот) од стратешките бази во Кадис и Севиља.
Учество на американски бродови во нападите
И покрај ограничувањата на шпанските копнени бази, поморските сили на САД кои претходно биле стационирани во Шпанија веќе се активни во конфликтот.
Вашингтон потврди дека американските разорувачи USS Bulkeley и USS Roosevelt, кои го напуштија пристаништето во Кадис минатата недела, директно учествувале во воените операции и нападите врз цели во Иран.
