Изгубен контакт со авион над Турција во кој бил началник на либиската армија

Турскиот министер за внатрешни работи Али Јерликаја објави дека е изгубен контакт со приватен авион што летал за Либија, во кој бил началникот на Генералштабот на либиската армија, кратко по полетувањето од аеродромот Есенбога во Анкара.

Деловниот авион „Фалкон 50“, со регистрација 9H-DFJ, полетал во 20:10 часот по локално време (18:10 часот по средноевропско време) за Триполи. Комуникацијата била изгубена околу 20:52 часот по локално време (18:52 часот по средноевропско време), изјави Јерликаја.

Тој рече дека авионот испратил известување за итно слетување во близина на Хајмана, област јужно од турската престолнина Анкара. „Сепак, не било можно да се воспостави понатамошен контакт со авионот по првичниот сигнал за итно слетување“, додаде тој.

Според официјалните лица, во авионот имало пет патници, вклучувајќи го и началникот на либискиот Генералштаб, генерал Мохамед Али Ахмед Ал-Хадад. Властите започнаа напори за пронаоѓање на авионот.