Израелскиот министер Бен-Гвир поднесе оставка поради договорот за прекин на огнот во Газа
Израелскиот крајнодесничарски министер за национална безбедност Итамар Бен-Гвир поднесе оставка во знак на протест против прекинот на огнот меѓу Израел и Хамас во Појасот Газа, објавија денеска израелските медиуми.
Екстремно десничарската, ултра-националистичка партија Оцма Јехудит (Еврејска моќ) на Бен-Гвир, која има шест места во 120-члениот Кнесет, ќе ја напушти владината коалиција, според извештаите.
Бен-Гвир долго време изразуваше отпор против договорот за прекин на огнот со Хамас, заканувајќи се дека ќе излезе од владата.
Десничарската верска влада на премиерот Бенјамин Нетанјаху ќе продолжи да има тенко мнозинство во парламентот и покрај излегувањето на Оцма Јехудит со 62 места.
Премиерот би го изгубил своето мнозинство, доколку министерот за финансии Безалел Смотрич, кој исто така гласно се спротивстави на прекинот на огнот, го следи примерот. Неговата партија Религиозен ционизам има седум места во Кнесетот.
Опозицискиот лидер Јаир Лапид најави дека би бил подготвен да му обезбеди на Нетанјаху „заштитна мрежа“ во парламентот за договор за заложници во таков случај.
