Извештајот на УЈП за приватните превозници се уште не е стигнат во Владата

Извештајот на Управата за јавни приходи (УЈП) се уште не е пристигнат во Владата и по неговото добивање се очекува министрите од економските ресори да одржат состаноци со приватните автобуски превозници и со Град Скопје.

Премиерот Димитар Ковачевски денеска одговарајќи на новинарски прашања по прес-конференцијата во Владата потврди дека извештајот на УЈП не е пристигнат во Владата.

– УЈП во рамки на своите надлежности прави контрола. Уште немаат завршено со извештај којшто е доставен до Владата. Кога тоа ќе биде направено, тогаш ќе можат министрите од економските ресори да се информираат за деталите и потоа задолжените министри ќе можат да одржат состаноци со Град Скопје и со приватните превозници, рече Ковачевски.

Тој посочи дека се работи за деловни односи меѓу приватните превозници, ЈСП и Град Скопје.

– Повторувам уште еднаш – тоа се исклучиво деловни односи меѓу приватните превозници, ЈСП и Град Скопје и дополнително деловни односи меѓу приватните превозници, затоа што ако ги видите видеата како држат состаноци меѓу себе, тоа и не е баш некое највисоко ниво од аспект на начин на одржување на состаноци, рече Ковачевски.

Back to top button
Close