Kaсами: Конечно е изгаснат пожарот во Тетово

Градоначалникот на Општина Тетово, Билал Касами, преку социјалните мрежи објави дека конечно е целосно изгаснат пожарот во магацините на компанијата „Пофикс” кој вчера избувна во поранешниот тутунски комбинат „Македонија Табак”.

Пожарот започна вчера во 9:30 часот, а при крајот на денот се локализираше. Ноќеска и до попладневните часови сѐ уште имаше чад и непријатен мирис од ова место на излезот од Тетово кон Скопје.

„По многу напори на екипата на Територијалната противпожарна единица и доброволци, конечно е изгаснат пожарот во магацинот на фабриката ‘Пофикс‘. Напорите на нашите херои го дадоа долгоочекуваниот резултат. Ваквите настани посакувам да не се повторат, со надеж дека иднината ќе биде добра и светла. Благодарност до сите учесници кои помогнаа во овие два исклучително тешки дена“, порача Касами.

Вчера од пожарната информираа дека неколкумина нивни колеги се полесно повредени или задушени поради интензивниот чад.