Командантот на руската армија, Валериј Герасимов: Руската инвазија во Украина ќе продолжи

Командантот на руската армија, генерал полковник Валериј Герасимов, најави продолжување на руската инвазија во Украина со нови цели за есенската офанзива, и покрај повиците од Западот за преговори.

-Во моментов, нападите се во тек на целата линија на фронтот. Денеска ги дефинираме задачите на поединечните групи на вооружените сили за есенскиот период, рече Герасимов.

Според Герасимов, руската армија контролира 99,7 отсто од украинскиот регион Луганск, 79 отсто од Доњецк, 76 отсто од Херсон и 74 отсто од Запорожје. Како предуслов за прекин на огнот, Москва бара украинската армија да се повлече од целиот Доњецк.

Украинскиот претседател Володимир Зеленски ги отфрла овие барања.

Украина сè уште ги држи градовите Славјанск и Краматорск, кои се сметаат за важни одбранбени упоришта.

Рускиот преговарач Кирил Дмитриев ги обвини западните сојузници на Киев за продолжување на конфликтот со нагласување на нереални барања.

-ЕУ треба да престане да го саботира мировниот процес, нагласи тој.

Москва постојано ја отфрла можноста европските земји да испратат свои сили во Украина за да обезбедат спроведување на мировниот договор.

Од друга страна, европските земји ја обвинуваат Русија дека купува време за да изврши нови напади.