Комплексот „Македонско село“ од 23 јуни ќе биде отворен за посетители

По седум години неработење и затворени врати, комплексот „Македонско село“ кое е лоцирано на падините на планината Водно во Горно Нерези, ќе биде одново отворен за посетители на 23 јуни, изјави директорот на Службата за општи и заеднички работи, Ивица Томовски за Вечер.

„Македонско село“ на 19 овој месец и официјално ќе биде предадено на фирмата „Ла Тераца“, која Службата за општи и заеднички работи при Владата ја избра за концесионер на комплексот. Томовски изјави дека примопредавањето ќе се случи во 11 часот, во присуство на претставници од Владата.

-На 23 или 24 овој месец, концесионерот „Ла Тераца“ ќе направи големо отворање. Инаку, работите околу подготовките на комплексот се во завршна фаза. Куќарките комплетно се подготвени, сега се уредува надворешниот дел – објасни Томовски.

Томовски нагласи дека на почеток, комплексот нема да може да работи со полн капацитет, но оти до крајот на месецот целосно ќе биде на располагање на посетителите.