Крмов од Левица иницира надзорна расправа за трагедијата во Кочани
Пратеникот на Левица, Борислав Крмов на денешната прес-конференција соопшти дека како пратеник од Третата изборна единиц иницирал надзорна расправа во врска со трагедијата во Кочани со цел да се расветлат сите пропусти.
– Во овие моменти кога сѐ уште не е поминат шокот од незамисливата национална катастрофа која се случи во Кочани, ние како пратеници и како Собрание, посебно пратениците од ИЕ 3, мора да поднесеме и морална одговорност. Поради тоа, денес, јас, како пратеник од ИЕ 3, покренувам иницијатива за Надзорна расправа во Собранието околу катастрофата што ни се случи во Кочани. Ние ги повикуваме сите партии. Оваа иницијатива ќе биде доставена денеска до сите останати партии. Очекуваме поддршка, рече тој.
Крмов информира дека таа расправа ја планираат да се одржи во постојаната Анкетна комисија за слободите и правата на граѓанинот со која раководи Димитар Апасиев.
-Но, отворени сме да биде и на било која друга комисија која и одговара на власта и на остатокот од опозицијата. За таа цел се потребни се минимум 15 потписи и ние ги даваме нашите шест. Отвараме простор да има и Анкетна комисија, има постојана Анкетна комисија во која може да се одржи расправата, но има и времена Анкетна комисија. Во тој случај ќе се повикаме на член 76 став 3 од Уставот, за која се потребни дваесет потписи и апсолутно, на нас не ни е битно ние да го водиме процесот, поентата е да се почне сега и веднаш за да се дојде до одговорите кои ни се потребни, објасни Крмов.
Пратеникот на Левица смета дека нема време за одмарање туку, како што рече, треба да се делува што побрзо.
-За жал, гледаме дека ВМРО-ДПМНЕ и СДСМ се препукуваат во медиумите, околу надзорна или анкетна, дали треба да има, или не, дали и за другите катастрофи, дали за Кочани итн. Ние мислиме дека нема време за ова, доволно време одмаравме, треба да се делува што побрзо. Мора да се види каде потфрлија органите на државната управа, зошто ни се случи ова што ни се случи и кои индивидуи се одговорни, потенцираше пратеникот Крмов.
Околу иницијативата за ДУИ за формирање на Анкетна комисија за истражување на селективен и едностран пристап на правосудниот систем во третманот на трагедијата во Кочани, Крмов нагласи дека таа уште не им е доставена на пратениците.
-Јас колку што сфаќам, тие ја поднеле во архива со недоволен број на потписи и претпоставувам дека и правилно претседателот Гаши им ја има отфрлено со 16 потписи, а потребни се 20. Прво би требало да ја видиме иницијативата. А од друга страна за жал во медиумите тоа што во медиумите тоа што го слушнав, премногу инклинира на давање на една етничка димензија на целата ситуација , што во овој момент апсолутно е непотребно и недостоинствено, рече крмов.
