Левица- ТОШКОВСКИ ЈА ШТИТИ ФАМИЛИЈАТА САЛИУ КОЈА РАКОВОДИ СО ДИРЕКЦИЈАТА ЗА ЗАШТИТА И СПАСУВАЊЕ
Селективната истрага за трагедијата во Кочани јасно демонстрира дека владата на Мицкоски свесно ги штити функционерите кои се дел од нивната коалиција. Надвор од сите правни норми е фактот што како осомничен во истрагата се јавува само еден поранешен директор на Дирекцијата за заштита и спасување (ДЗС), додека актуелните директори се целосно иземени од одговорност.
Од 2008 до 2017 година со оваа нефункционална институција раководеше ШАБАН САЛИУ, кој моментално е министер без ресор во владата на Мицкоски. Дополнително, неговиот внук КАШМИР САЛИУ моментално е заменик-директор на ДЗС, по принципот на задоволување на коалиционите апетити, без да се земе во предвид компетентноста за една институција која треба да ја гарантира безбедноста на граѓаните. Во истрагата не е опфатен ниту актуелниот директор на Дирекцијата за заштите и спасување – ЏЕВАТ СЕЛАМИ, кој воопшто го нема ни да се појави во јавноста како клучен одговорен во алката на системот за заштита.
Трагедијата во Кочани на површина ја изнесе нефункционалноста на оваа дирекција, која единствено служи за ухлебување на кадри од коалиционите помали партнери, а фамилијата Салиу е најдолго присутна во катастрофалното менаџирање на оваа институција. Впрочем, во подрачното одделение на Дирекцијата за заштита и спасување (ДЗС) во Кочани, уште од 2012 година не е пополнето работното место за инспектор за заштита од пожари, откако претходниот заминал во пензија во март истата година. Односно, Салиу повеќе од 5 години ја оставил општина Кочани без инспектор!
Не може министерот Тошковски да ја игнорира одговорноста на директорите кои раководеле со клучниот сектор надлежен за гарантирање на заштитата на граѓаните. Додека Тошковски шири демагогии дека за оваа катастрофална трагедија никој нема да биде иземен од одговорност, фактите се дека неговите коалициони партнери се амнестирани целосно. Недозволиво е при една ваква трагедија правдата да биде селективна и токму заради тоа, доколку Тошковски не е способен да ги надмине теснопартиските интереси – истиот веднаш треба да си поднесе оставка.
