Лидерите на ЕУ: Само доколку сме обединети ќе бидеме посилни од вирусот (ВИДЕО)

Лидерите на ЕУ и на земјите-членки на ЕУ испратија порака до граѓаните на заедницата во врска со пандемијата, во која им се заблагодаруваат и им даваат надеж на крајот на 2020 година.

Тие тоа им го порачаа во кратки видео пораки, објавени на веб-страницата на Европскиот совет, кои ги снимија одделно, со наслов „Обединети против ковид-19“.

Претседателот на Европскиот совет, Чарлс Мишел, рече дека тим од 450 милиони граѓани на ЕУ може да ја стави пандемијата под контрола доколку ги почитува мерките, се грижи за себе и за другите.

Германската канцеларка Ангела Меркел рече дека најдобрата заштита од пандемијата е во наши раце.

– Ограничете ги контактите, носете маски, држете се на дистанца и покажете внимание кон другите. Заедно ќе бидеме посилни од вирусот – рече Меркел.

Францускиот претседател Емануел Макрон им се заблагодари на граѓаните за нивната одговорност и солидарност и додаде дека тие мора да продолжат да бидат солидарни и одговорни се додека не се појави вакцината.

– Само на овој начин можеме да се спротивставиме на вирусот. Се надевам дека вакцината ќе стави крај на пандемијата – рече Макрон.

Унгарскиот премиер Виктор Орбан повика на обединување во борбата против ковид-19.

– Ако се обединиме, ќе победиме – рече тој.

Италијанскиот премиер Џузепе Конте истакна дека Божиќ е време на радост, но дека мора да останеме внимателни.

– Божиќ ќе биде различен, но развојот на вакцината е голем знак на надеж – рече Конте.

Австрискиот канцелар Себастијан Курц изјави дека пандемијата многу ја погоди Европа и дека е благодарен на многу граѓани кои помогнаа.

– Посебна благодарност до лекарите и оние кои работеа во домовите за нега на постари лица, а пред се на истражувачите кои работеа – рече Курц.

Слични пораки испратија и други лидери на земји-членки на ЕУ, како што се хрватскиот и словенечкиот премиер Андреј Пленковиќ и Јанез Јанша, словачкиот премиер Игор Матович и многу други.