Лидерот на талибанците во Авганистан тврди дека погубувањата се дел од исламот

Лидерот на авганистанските талибанци, Хибатула Акунзада денеска изјави дека егзекуциите што се случија на спортските стадиони во таа земја се „дел од исламот“.

Откако во петокот четворица мажи беа убиени од огнено оружје, кои претходно беа осудени за убиство, Акунзада рече дека талибанците „мора да спроведуваат дисциплински мерки“, јавија американските медиуми.

„Мораме да спроведуваме дисциплински мерки, да вршиме молитви и ибадети. Мораме целосно да влеземе во исламот. Исламот не е ограничен само на неколку ритуали, тој е сеопфатен систем на сите божествени заповеди“, рече Акунзада во аудио снимката што денеска ја објави главниот портпарол на талибанците, Забихула Муџахид, на платформата X.

Акунзада претходно ја отфрли потребата од западни закони во Авганистан.

Авганистанскиот Врховен суд претходно пресуди дека четворицата егзекутирани мажи се виновни за убиство, а смртните казни дојдоа откако семејствата на наводните жртви одбија да им дадат амнестија на обвинетите мажи.

Коментарите на Акунзада доаѓаат додека талибанците бараат поголем ангажман со меѓународната заедница и со западните земји.